|
MAIO - 2008
- Comisión Informativa de Ensino, Cultura, Deportes e Mocidade
A Comisión Informativa de Ensino, Cultura, Deportes e Mocidade, presidida por Patricia Bello, será convocada en próximas datas para tratar asuntos que se elevarán á próxima sesión ordinaria do Pleno, prevista para o vindeiro día 28 do presente mes de maio.
O tema principal a tratar será a creación do Consello Escolar Municipal, decisión que se tomou despois de diversas entrevistas entre membros do Concello da Laracha e de representantes dos diferentes sectores da educación.
O Consello Escolar Municipal, do que dispoñen moi poucos Concellos en Galicia, é un órgano de consulta e participación dos sectores afectados na programación do ensino non universitario e na planificación dos centros escolares no ámbito municipal.
A súa función será consultiva, tanto para a administración educativa como para o Concello, en cuestións que afecten ao ensino do municipio, como poden ser os convenios coas diferentes administracións ou o fomento de actividades para mellorar a calidade do ensino.
Anualmente, trala finalización do curso escolar, o Consello Escolar Municipal deberá realizar un informe sobre o estado do ensino no Concello que será remitido á Corporación Municipal.
- Presentación Curso de Arte Floral
O vindeiro mércores, día 14 de maio, celebrarase a partir das 20.30 horas na Casa da Cultura da Laracha o acto de inauguración do curso de arte floral que organiza o Departamento de Cultura do Concello da Laracha.
Apuntáronse para participar preto de cen persoas, polo que foi necesario dividir aos alumnos en tres grupos. Ao longo das 20 horas de duración do curso, que se repartirán en xornadas de dúas horas de duración, realizaranse centros con flores naturais e con flores secas.
A actividade, que se desenvolverá no centro sociocultural de Vilaño, é totalmente gratuíta para os participantes.
Agárdase a presenza neste acto de presentación do curso de arte floral do alcalde do Concello da Laracha, José Manuel López Varela.
- Campamentos Deportivos 2008
Os rapaces da Laracha de entre 9 e 13 anos de idade que desexen participar nos Campamentos Deportivos 2008 da Deputación da Coruña xa poden realizar a súa inscrición na Oficina de Información Xuvenil do Concello da Laracha. O prazo rematará o 12 de xuño.
A Laracha participará na segunda quenda dos Campamentos, entre o 6 e o 12 de xullo. Durante toda a semana os rapaces participarán en diferentes actividades deportivas: golf, vela de cruceiro, tenis, volei praia e outros xogos. Tamén haberá tempo para realizar actividades relacionadas co medio natural e visitas a centros de interese cultural da Coruña.
A cota de inscrición é de 85 euros, que inclúe o transporte de ida e volta, estadía, manutención e os gastos das actividades programadas.
- Estadías de Tempo Libre Para Mulleres
O Departamento de Servizos Sociais do Concello da Laracha informa que ata o vindeiro 21 de maio permanecerá aberto o prazo de presentación de solicitudes para estadías de tempo libre para mulleres soas con cargas familiares non compartidas.
A finalidade desta convocatoria é facilitar ás mulleres que teñan fillos menores exclusivamente ao seu cargo un espazo e un tempo desligado da súa situación habitual, nunha convivencia e nun contorno de lecer.
O programa consiste nunha estadía de oito días, en réxime de pensión completa e na primeira quincena do mes de xullo. As mulleres seleccionadas irán acompañadas dos seus fillos, sempre e cando estes teñan unha idade comprendida entre os 2 e os 12 anos.
- O Concello Mantén o Servizo Noitebús
Despois das xestións realizadas polo Concello da Laracha coa empresa Autocares Vázquez, decidiuse manter o servizo Noitebús no municipio a pesar de que a Dirección Xeral de Transportes da Xunta de Galicia non resolveu aínda a concesión da subvención.
Desde o Concello da Laracha solicitárase xa nos últimos días de 2007 unha prórroga de continuidade deste servizo mentres a Xunta de Galicia non convocaba as axudas para este ano, que se publicaron o pasado 29 de febreiro.
Ao longo dos últimos catro meses, entre xaneiro e abril, o Concello da Laracha foi o responsable dos gastos das seis liñas que dan servizo ao municipio (dúas á Coruña e unha a Carballo, cos seus traxectos de ida e volta).
Tendo en conta a nova convocatoria de axudas, este Concello, en colaboración cos de Arteixo e Carballo, solicitou a subvención para o financiamento deste servizo, cunha variación nas liñas a partir do 1 de maio, ao tempo que se pedía que a Xunta de Galicia se fixese cargo dos custos do Noitebús dos últimos catro meses. Pero a día de hoxe non se recibiu resposta algunha.
A pesar diso, e para non prexudicar nin aos usuarios do Noitebús nin aos hostaleiros da Laracha, o Concello manterá as liñas e o servizo tal e como se veu ofrecendo durante os últimos meses e non se realizará, aínda, a variación nas liñas acordada entre o noso Concello e os de Carballo e Arteixo.
- Probas de Selección de Persoal Para Brigadas de Incendios
Preto de cincocentas persoas participaron nas probas para a selección do persoal do dispositivo de verán das brigadas de incendio de terra que se desenvolveron ao longo da xornada deste venres no pavillón polideportivo da Laracha.
O Concello colaborou coa Consellería de Medio Rural na organización destas probas de selección de peóns, xefes e técnicos das brigadas de incendio, que son realizadas pola empresa pública Seaga.
Os aspirantes que superen este test físico realizado na Laracha deberán superar, posteriormente, outra serie de probas para acadar definitivamente a praza.
- Aberto ao Público o Novo Xardín da Praza do Concello
O novo xardín situado nun lateral da praza do Concello, xunto á Casa Consistorial, abriuse ao público este venres.
A obra foi levada a cabo polo Obradoiro de Emprego “Laracha III”, que realizou os traballos de demolición da soleira existente na marxe dereita da Casa Consistorial para, posteriormente, realizar a construción dun paseo perimetral pavimentado en granito, o acondicionamento dunha zona axardinada que conta con tres sendas de lousa, tamén de granito, e a creación dunha escalinata de entrada desde a Avenida Finisterre. Ademais, unificáronse as dúas áreas da praza retirando o peche.
Á hora da creación deste novo xardín respectáronse a maior parte das árbores situadas no lugar.
- Xunta Local de Seguridade
O salón de plenos do Concello da Laracha acolleu no mediodía deste venres a sesión extraordinaria da Xunta Local de Seguridade, que estivo presidida polo subdelegado do goberno en Galicia, José Manuel Pose Mesura. Tamén asistiron, ademais do secretario da Corporación, o alcalde do Concello da Laracha, José Manuel López Varela, o Tenente Xeneral - 2º Xefe da Comandancia da Garda Civil da Coruña, o Capitán da Garda Civil – Xefe da Compañía de Carballo, o Sarxento Comandante do Posto da Garda Civil da Laracha e o Jefe da Policía Local do municipio.
A Xunta Local de Seguridade xirou en torno aos dous puntos da Orde do Día. No primeiro deles abordouse a situación actual da seguridade cidadá na Laracha, tratando temas como a movida nocturna, a afluencia de persoas e tráfico á feira de Paiosaco e a coordinación dos servizos en materia de seguridade para as próximas festas das Cereixas de Paiosaco, as patronais da Laracha e as dos Milagres de Caión. A Garda Civil da Laracha achegou, ademais, un informe estatístico sobre a delincuencia no Concello.
No segundo punto analizouse a situación da violencia de xénero na Laracha, coa presenza da psicóloga e directora do Centro de Información á Muller do Concello, Ana Aldao, que fixo un balance das actuacións do CIM desde a última Xunta Local de Seguridade, resaltando o elevado índice de consultas realizadas polas veciñas do municipio e a baixa taxa de violencia de xénero que presenta A Laracha. Ana Aldao salientou, así mesmo, a excelente colaboración existente entre o Concello, a Policía Local e a Garda Civil.
- Probas de Selección de Persoal Para Brigadas de Incendios
O Concello da Laracha colabora coa Consellería de Medio Rural da Xunta de Galicia na organización das probas para a selección do persoal por parte da empresa pública Seaga do dispositivo de verán das brigadas de incendio de terra.
As probas, para as que se convocou a 500 persoas, desenvolveranse no pavillón da Laracha ao longo da xornada deste venres, comezando ás 8.00 horas.
Para a selección do persoal terase en conta o número de pulsacións dos participantes despois de realizar unha proba física.
Os postos que se deben cubrir son peóns, xefes e técnicos das brigadas de incendio de terra.
- Aberto o Prazo de Inscrición Para as Viaxes do Imserso
O Departamento de Servizos Sociais do Concello da Laracha informa que xa poden tramitarse as solicitudes para participar nas viaxes do IMSERSO que se realizarán entre os meses de outubro de 2008 e xuño de 2009.
As persoas beneficiarias son aquelas que teñan cumpridos 65 anos e ser pensionistas de xubilación do Sistema Público de Pensións, ou ben ser pensionistas de viuvez e ter cumpridos os 55 anos ou ser prexubilado e ter, canda menos, 60 anos de idade.
Existen catro modalidades diferentes nas viaxes do Imserso: estadía en zonas costeiras, viaxes culturais para coñecer a historia e a arte de diferentes cidades de España, turismo de natureza con rutas por paraxes pintorescos e viaxes a Portugal.
Os destinos que se ofrecen son Andalucía, Cataluña, Murcia, Comunidad Valenciana, Baleares, Canarias e Portugal.
O prazo para a presentación de solicitudes rematará o vindeiro día 10 de xuño.
Termalismo do Imserso
Desde o Departamento de Servizos Sociais do Concello da Laracha lembramos que o venres 16 de maio rematará o prazo para as quendas setembro-decembro do programa “Termalismo do Imserso”, que consiste en conceder doce días de vacacións nun balneario, con réxime de pensión completa e incluíndo o tratamento, aos maiores que precisan, mediante prescrición médica, dalgún tratamento termal, co fin de aliviar a súa doenza.
Os beneficiarios deben ser pensionistas por concepto de xubilación, invalidez ou viuvez e ter cumpridos 60 anos de idade. Deberán, ademais, presentar a acreditación mediante prescrición médica dos tratamentos termais que solicita.
Tamén poden ser beneficiarios os cónxuxes das persoas que reúnan estes requisitos, aínda que eles non sexan pensionistas.
- Inicio das Obras do POS 2008
Este martes comezaron a realizarse as primeiras obras incluídas no Plan de Obras e Servizos (POS) da Laracha deste ano 2008.
As primeiras actuacións están a desenvolverse na parroquia de Coiro e consisten nos traballos de limpeza de cunetas, previos á pavimentación con aglomerado asfáltico en quente, desde o núcleo dos Muíños, xusto no enlace coa estrada provincial, ata o lugar de Novás.
A outra obra que se está levando a cabo na parroquia de Coiro é o acondicionamento da ponte da estrada que une os núcleos dos Muíños de Abaixo cos Muíños de Arriba.
Á marxe das actuacións previstas no Plan de Obras e Servizos, estanse realizando as tarefas para a instalación da rede de abastecemento de auga desde o núcleo das Meneiroas ata Os Muíños, tamén en Coiro, unhas obras que son financiadas integramente con fondos propios municipais.
O Concello da Laracha adxudicou as obras do POS 2008 na Xunta de Goberno Local celebrada o 18 de abril e agora estanse acometendo as primeiras das 25 actuacións que contempla o Plan, todas elas en camiños e núcleos situados en dez parroquias do municipio. O orzamento total do POS 2008 da Laracha ascende aos 362.194,64 euros.
- Reunión coa Delegada Provincial da Consellería de Cultura
O alcalde do Concello da Laracha, José Manuel López Varela, e a conelleira de Ensino, Cultura, Deportes e Mocidade, Patricia Bello, mantiveron na mañá deste martes unha xuntanza na Coruña coa delegada provincial da Consellería de Cultura da Xunta de Galicia, Milagros Lantes Seara, na que se falou, principalmente, do centro sociocultural de Porta Santa – Paiosaco.
Dita obra está en proceso de contratación despois de que o Concello resolvese o contrato coa empresa Suso Fernández S.L, á que se lle adxudicara a obra na Xunta de Goberno Local do pasado 21 de decembro. Realizouse antes do inicio do novo proceso de contratación unha modificación e mellora do proxecto, o que supuxo un aumento do seu orzamento ata situarse preto do millón de euros.
O centro sociocultural de Porta Santa será o eixo cultural de Paiosaco e nel desenvolveranse diferentes actividades e cursos. O Concello pretende, ademais, poñer en funcionamento nese lugar unha nova biblioteca municipal.
O grupo do goberno do Concello da Laracha, co alcalde á frente, entregoulle á delegada provincial da Consellería de Cultura unha copia do novo proxecto do centro sociocultural Porta Santa – Paiosaco e, en base a el, solicitoulle unha axuda para o financiamento desta importante obra.
- Curso de Recursos na Internet para Mulleres
O Concello da Laracha, a través do seu Centro de Información á Muller (CIM), organiza un curso de informática denominada Recursos na Internet para Mulleres.
Esta actividade vai dirixida a todas aquelas mulleres que desexen familiarizarse co manexo dun ordenador e coa utilización da Internet e que non teñan coñecementos previos de informática ou que estes sexan básicos.
O curso terá unha duración de 20 horas e hase desenvolver na aula de informática do edificio de Servizos Múltiples da Laracha en horario de tarde os luns, mércores e venres desde o vindeiro 19 de maio ata o 9 de xuño.
Todas as mulleres interesadas en participar no curso de informática Recursos na Internet para Mulleres xa poden apuntarse dirixíndose ao Centro de Información á Muller do Concello da Laracha.
- Clausura do Curso de Patchwork
No serán do pasado luns, día 5 de maio, tivo lugar o acto de clausura do curso de patchwork que se veu desenvolvendo ao longo dos últimos sete meses, desde outubro, nunha aula habilitada no edificio de Servizos Múltiples da Laracha.
As preto de trinta participantes recibiron os seus diplomas de mans do alcalde do Concello da Laracha, José Manuel López Varela, e da concelleira de Ensino, Cultura, Deportes e Mocidade, Patricia Bello.
Os traballos realizados durante todo o ano polas alumnas do curso de patchwork serán expostos na Laracha como parte do programa do San Isidro 2008. Tamén se exporán ao longo desas datas os traballos realizados polos participantes nos cursos de restauración, tapicería, manualidades, pintura ao óleo, encaixe de palillos e olería. Todos estes cursos, que tamén se veñen desenvolvendo desde o pasado mes de outubro, terán o seu acto de clausura entre esta semana e a que vén.
- Exposición Carteis de Xosé María Álvarez Blázquez
O Concello da Laracha organiza, dentro do seu programa para conmemorar o Día das Letras Galegas, unha exposición de carteis de Xosé María Álvarez Blázquez, escritor ao que se dedica este ano en Galicia o 17 de maio.
Da obra de Xosé María Álvarez Blázquez (Tui, 1915; Vigo, 1985) cabe salientar as súas publicacións no xénero da narrativa infantil, coas coleccións de relatos Os ruíns (1936) e A pega Rabilondo e outras historias de tesouros (1971).
Extensa foi a súa obra no xénero da lírica, con publicacións como Poemas de ti e de min (1949), Roseira do teu mencer (1950), Cancioneiro de Monfero (1953), ou Romance do pescador peleriño (1954), unha das obras máis importantes do neotrobadorismo galego.
O programa para a conmemoración do Día das Letras Galegas deste ano 2008 no Concello da Laracha tamén inclúe, ademais desta exposición, o I Concurso de Microrrelatos “Sentir A Laracha” e a representación da obra de teatro A lingua das bolboretas.
O I Concurso de Microrrelatos “Sentir A Laracha” está organizado polo Departamento de Normalización Lingüística e repartirá preto de 400 euros en premios e tres lotes de libros para os tres mellores textos, seleccionados por un xurado, entre todos os participantes.
Estes microrrelatos deben cumprir certas características, tales como ser orixinais, estar escritos en galego, ter unha extensión máxima de 130 palabras e unha temática que debe xirar en torno ao Concello da Laracha. A data límite para a entrega dos textos no rexistro central situado na Casa Consistorial será o día 30 deste mes de maio.
A obra de teatro A lingua das bolboretas será representada pola compañía Teatro do Andamio o venres 16 de maio na Casa da Cultura en dous pases: un ás 12.00 horas, ao que asistirán escolares do IES Agra de Leborís, e outro ás 21.00 horas, dirixido a todos os públicos.
- O Vicepresidente da Deputación Visita o Futuro Museo de Golmar
O alcalde e o tenente de alcalde do Concello da Laracha, José Manuel López Varela e Ramón Martínez Barbeito, fixeron este luns de anfitrións na visita ao museo de interpretación dos muíños de auga da Costa da Morte (que albergará a antiga Casa Reitoral de Golmar) do vicepresidente da Deputación da Coruña, Pablo Villamar, que estivo acompañado polo concelleiro da Laracha e deputado responsable da área de benestar social, políticas de igualdade e de xénero e normalización lingüística, Xoán Manuel Sande, e polo xerente do Plan de Dinamización Turística da Costa da Morte, Ignacio Fernández Dosil.
Esta visita oficial representa o paso previo á apertura ao público do museo. Para elo tan so resta realizar a canalización para os diferentes servizos (entre eles, o da subministración da electricidade) e que se finalicen os traballos de acondicionamento do medio do edificio.
Despois de rematadas as actuacións para a rehabilitación da Casa Reitoral e a súa musealización, principiou o traballo do Obradoiro de Emprego Laracha III, que levou a cabo a limpeza de toda a zona, a construción dun muro de pedra perimetral e a poda das árbores que se sitúan xunto ao edificio. Arestora estase avanzando nas tarefas para o adoquinado con lousas de granito desde a fronte da propia Casa Reitoral ata o final do recinto, dando acceso deste xeito ao futuro museo desde o amplo aparcamento que se está habilitando. Tamén se reservou unha zona para la creación de un parque infantil e prevese a instalación de diverso mobiliario urbano.
O museo de interpretación dos muíños de auga da Costa da Morte de Golmar será un punto de referencia cultural no norte de Galicia.
- A Laracha Suspendará o Servizo Noitebús Se Non Se Resolve a Subvención
O Concello da Laracha anuncia que na próxima fin de semana suspenderá o servizo Noitebús mentres a Dirección Xeral de Transportes da Xunta de Galicia non resolva a concesión de subvención solicitada.
Desde o Concello da Laracha solicitárase xa nos últimos días de 2007 unha prórroga de continuidade deste servizo en tanto a Xunta de Galicia non convocaba as axudas para este ano, que se publicaron o pasado 29 de febreiro.
Ao longo dos últimos catro meses, entre xaneiro e abril, o Concello da Laracha foi o responsable dos gastos das seis liñas que dan servizo ao municipio (dúas á Coruña e unha a Carballo, cos seus traxectos de ida e volta).
Tendo en conta a nova convocatoria de axudas, este Concello, en colaboración cos de Arteixo e Carballo, solicitou a subvención para o financiamento do Noitebús, cunha variación nas liñas a partir do 1 de maio, ao tempo que se pedía que a Xunta de Galicia se fixese cargo dos custos do servizo dos últimos catro meses. Pero a día de hoxe non se recibiu resposta algunha.
Por iso o Concello da Laracha vese obrigado a tomar esta decisión de suspender o servizo Noitebús a partir da fin de semana que vén, a do 10 de maio, se é que non se resolve a concesión desta subvención.
Desde o Concello decidimos manter funcionando o Noitebús este sábado, día 3 de maio, para non prexudicar aos seus usuarios.
- Inicio da Campaña de Desbroces do Ano 2008
A Concellería de Urbanismo e Obras Públicas do Concello da Laracha, que dirixe Jesús Souto, informa que nos próximos días se iniciarán os traballos de limpeza e desbroce de cunetas nas pistas municipais. Estas tarefas comezarán a desenvolverse, en primeiro lugar, nas parroquias de Lestón e Lendo e, posteriormente, levaranse a cabo nas outras once que compoñen o municipio.
Ademais das actuacións nas estradas, realizarase a limpeza en zonas de núcleo urbano en base ao programa de prevención de incendios e ao establecido na lei 3/2007.
Continuando cos criterios dos anos anteriores, empregaranse dous tractores para facilitar estes traballos e que se poida actuar simultaneamente en dous lugares diferentes.
Na campaña de desbroce do ano 2007 que se realizou no Concello da Laracha alcanzáronse os 300 quilómetros de pistas acondicionadas, ademais doutros 80 quilómetros que tamén se executaron aproveitando as obras de pavimentación e de mantemento de diferentes camiños.
En canto á limpeza de zonas para a prevención de incendios, en 2007 o Concello da Laracha adecuou preto de 25 hectáreas neste concepto.
- Última Fase das Obras no Igrexario de Lemaio
Os traballos que está a realizar o Obradoiro de Emprego Laracha III no Igrexario de Lemaio para a construción dunha praza entraron na súa última fase e nas próximas datas se abrirá ao público.
Esta nova praza, situada xunto á igrexa parroquial de Santa Mariña de Lemaio, conta xa cunha ampla zona axardinada, instalouse diverso mobiliario urbano para ofrecer un lugar de reunión aos veciños, levantouse un muro de pedra perimetral e a rehabilitouse o hórreo que se atopa ao fondo da praza. As obras rematarán coa retirada do cableado aéreo e a canalización subterránea para os servizos eléctrico e telefónico.
O Concello tamén pretende trasladar o Cruceiro de Lemaio ao interior da praza para integralo nesta zona e conseguir, ademais de resaltar a súa beleza, protexelo dos vehículos que circulan por esa vía xa que este emblemático elemento do noso patrimonio cultural está situado en plena calzada. O Concello agarda a resposta á solicitude remitida a mediados do pasado mes de xaneiro á Delegación Provincial da Consellería de Cultura da Xunta de Galicia –organismo do que depende o Servizo Provincial de Patrimonio Cultural- para obter a autorización para o traslado do cruceiro.
O alcalde do Concello da Laracha, José Manuel López Varela, visitou o lugar das obras xunto ao concelleiro de Urbanismo e Obras Públicas, Jesús Souto. Ambos comprobaron o bo ritmo de execución da obra e a importante transformación do lugar, co que se aumentan as zonas de ocio e esparexemento existentes no Concello da Laracha.
- A Xunta de Goberno Local Acorda Solicitar 150.000 Euros en Subvencións
A Xunta de Goberno Local, reunida en sesión ordinaria este venres día 2 de maio, acordou solicitar diversas subvencións para a realización de diferentes proxectos, programas e actividades dirixidas á mellora dos accesos e dos servizos na praia de Caión, apoio ás festas populares e á xuventude.
Deste xeito pedirase unha axuda á Consellería de Innovación e Industria para o financiamento do proxecto de mellora nos accesos e dos servizos que se ofrecen na praia de Caión. Realizarase unha importante mellora na zona de aparcadoiro, a dotación de diverso mobiliario urbano, ampliación do número de colectores para a recollida selectiva do lixo e melloras nos puntos de duchas na praia. O orzamento deste proxecto ascende aos 50.000 euros.
Á Deputación Provincial da Coruña solicitarase unha subvención duns 25.000 euros para a contratación de dúas cuadrillas de limpeza que traballarían na praia de Caión ao longo do verán.
Tamén á Consellería de Innovación e Industria se solicitará outra axuda duns 8.000 euros para o financiamento da programación infantil e xuvenil que se porá en marcha na Romaría dos Milagres de Caión, a festa popular e relixiosa máis coñecida da Laracha e unha das máis importantes do norte de Galicia. Estas actividades que se organizarán están pensadas para facer máis amena e divertida a Festa dos Milagres aos mozos.
Por último, á Vicepresidencia da Igualdade e do Benestar o Concello da Laracha solicita unha subvención de 75.000 euros para o financiamento de actividades dirixidas á xuventude, cantidade que se destinaría á contratación do persoal e ao equipamento das oficinas de información xuvenil da Laracha e de Caión, a adecuación dunha aula de internet e a contratación dun auxiliar para ela, realización de campamentos de verán, así como de diferentes campañas informativas e cursos.
Certificacións de obra
Aprobouse a certificación segunda da obra “Instalación de iluminación pública na Avenida Buenos Aires”, por un importe de 17.000 euros.
Licencias urbanísticas
Concedéronse 6 licencias urbanísticas maiores (unha delas para a construción dunha vivenda unifamiliar) e 14 menores.
Facturas
Aprobáronse facturas por un importe total de 105.200 euros, entre as que cabe salientar o pago do primeiro trimestre de 2008 á empresa Aquagest.
- O Concello Convida aos Rapaces a Asistir ao Deportivo – Levante
O Concello da Laracha convida a todos os veciños de idades comprendidas entre os 10 e os 17 anos a asistir ao encontro da 36ª Xornada de Liga de Primeira División que este mércores, día 7 de maio, disputarán no Estadio Municipal de Riazor o Deportivo de La Coruña e o Levante a partir das 20.00 horas.
Todos os interesados deben reservar a súa praza na Oficina de Información Xuvenil. Para elo poden dirixirse á segunda planta da Casa Consistorial ou chamar ao teléfono 981 60 50 01.
O autobús partirá ás 18.30 horas desde a Praza do Concello. O regreso será despois do partido.
- O Concello Solicita Subvencións Para Diferentes Programas
O Concello da Laracha, a través da súa Axencia de Emprego e Desenvolvemento Local, ten solicitadas diferentes subvencións para a organización de programas de formación que se pretenden levar a cabo e ofrecer dun xeito gratuíto a todos os veciños.
Educación para a sostenibilidade
Solicitouse unha subvención á Consellería de Medio Ambiente e Desenvolvemento Sostible para o desenvolvemento de actividades de educación para a sostenibilidade. Preténdese levar a cabo un obradoiro pensado para orientar aos nenos nos hábitos da reciclaxe e unhas xornadas de limpeza na praia de Caión na que participarían rapaces de entre 14 e 17 anos de idade.
Programas “A Laracha: formar para insertar”
Este programa trátase dun plan integral de emprego que está estruturado en varios piares polos que todos os participantes deben pasar para conseguir o obxectivo final da inserción nunha empresa.
En primeiro lugar orientarase aos interesados en participar no programa sobre o tipo de formación que é a máis interesante para cada persoa. Posteriormente, aos participantes, que serían 30 persoas desempregadas, se lles ofrece a posibilidade de aprender un oficio con “futuro” para poder insertarse no mercado laboral: poderán formarse como instaladores de sistemas de enerxía solar térmica ou como carpinteiros (formación baseada no programa de formación profesional ocupacional, FIP).
En todo momento os alumnos terán á súa disposición dous monitores para cada unha das especialidades e un titor para a etapa continua de captación, asesoramento e orientación das persoas susceptibles de participar no programa “A Laracha: formar para insertar”.
Para a posta en funcionamento deste proxecto solicitouse unha subvención á Consellería de Traballo.
Accións formativas do plan FIP
O Concello da Laracha pediu á Consellería de Traballo outra subvención con cargo ao Plan Nacional de Formación e Inserción Profesional (FIP) para o desenvolvemento no municipio dos cursos de dependente de comercio, axudante de cociña e maquinista de confección industrial.
Cada un destes cursos contaría con 15 participantes e unha media de 350 horas de duración.
Estas actividades son una boa posibilidade para a inserción laboral dos participantes debido ao aumento da importancia no Concello da Laracha do sector servizos.
Accións formativas experimentais e complementarias do Plan FIP
Tamén á Consellería de Traballo solicitou o Concello da Laracha unha subvención para a organización deste plan a través do cal se desenvolverían dous programas formativos: o de animador xerontolóxico e o de axudante de local de hostalería.
En cada acción formativa participarían 15 persoas desempregadas, que serían formadas ao longo das 300 horas de duración de cada programa co obxectivo de favorecer e mellorar as súas posibilidades de inserción laboral.
Programa FORMIC
Con cargo ao programa de Formación nas Zonas Mineiras e do Carbón pídese unha axuda para a realización dun curso de formación profesional na ocupación de fontaneiro.
Este curso, no que participarían 15 persoas, constaría dun total de 754 horas de duración, das cales 174 estarían dedicadas á teoría e 580 á práctica.
Sesións Informativas da Cámara de Comercio
Como vén sendo habitual nos últimos anos, o Concello da Laracha, en colaboración coa Cámara de Comercio da Coruña, ofrecerá charlas informativas totalmente gratuítas e dirixidas aos comerciantes co obxectivo de informalos e orientalos sobre como mellorar as condicións do seu negocio.
Este ano as estas sesións, que se desenvolverán ao longo do verán, tratarán os temas de como triunfar nunha franquicia e as estratexias do pequeno comercio para ser competitivo.
- Entrevista do Alcalde coa Directora Xeral de Admistración Local
O alcalde do Concello da Laracha, José Manuel López Varela, mantivo na mañá deste martes unha reunión en Santiago de Compostela coa Directora Xeral de Administración Local, Begoña Rodríguez Rumbo, para darlle conta persoalmente da necesidade da construción dun novo edificio administrativo no municipio.
A implantación dos cada vez máis numerosos servizos que se ofrecen aos veciños e que se están situando na propia Casa Consistorial -oficinas de información xuvenil e a do consumidor, o Centro de Información á Muller (CIM), os servizos de urbanismo e normalización lingüística, dependencias da policía local, etc.- motivou que o Concello elaborase un anteproxecto valorado dese edificio, que se pretende levantar no terreo onde se sitúa a antiga cámara agraria, unha parcela de propiedade municipal adquirida á Xunta de Galicia.
Un novo edificio administrativo ofrecería unha maior comodidade para realizar esas labores e iso beneficiaría tanto aos traballadores como aos veciños. Estímase en 1.309.785 euros o investimento a realizar para a construción dese novo edificio, que contaría cun soto, planta baixa e tres plantas.
O grupo do goberno da Laracha xa acordara na súa Xunta do 28 de marzo pasado solicitar unha subvención á Consellería de Presidencia, Administracións Públicas e Xustiza da Xunta de Galicia para este fin. Anteriormente o propio alcalde da Laracha, José Manuel López Varela, aproveitara a visita institucional da Delegada Provincial da Consellería de Presidencia, Aurora Moinelo, o pasado día 23 de outubro de 2007 para solicitarlle a construción do edificio.
Coa reunión celebrada este martes deuse un paso máis nesta pretensión do Concello, que con esta mellora nas súas infraestruturas o que pretende é ofrecer unha maior comodidade para realizar as labores e desenvolver os servizos propios da administración, e iso beneficiaría tanto aos traballadores como aos veciños da Laracha.
- Placa Itinerario Vía Romana XX
No novo xardín da Praza do Concello instalouse unha placa na que se indica que A Laracha forma parte da antiga vía romana XX, a denominada Per Loca Marítima.
Dita placa, situada nun bloque de granito integrado no novo xardín público, foi colocada recentemente pola Deputación da Coruña dentro do programa de cooperación territorial Interreg como medio para a conservación do patrimonio cultural.
Na placa pode lerse, literalmente, “Na igrexa de Santiago de Vilaño atopouse en 1985 un miliario. Formaba parte da porta de acceso á sancristía, polo que foi retocado e fai difícil a lectura e interpretación da súa inscrición. Está dedicado a Decentio e pode ser datado entre os anos 350 e 353 d.C.”. |
